चर्चा गोष्ठी,पदाधिकारी मन के सपथ ग्रहण,अउ होईसे कवि गोष्ठी,
Indian News : बेमेतरा | प्रांतीय छत्तीसगढ़ी साहित्य समिति जिला ईकाई बेमेतरा के गठन गांधी भवन बेमेतरा म मंझनिया 1 बजे से शुरू होईसे जौन संझा 5 बजे तक चलिसे जिला पदाधिकारी अउ जिला कार्यकारिणी के सपथ ग्रहण,चर्चा गोष्ठी अउ कविता पाठ छत्तीसगढ़ी भाखा म करे गईसे ये कार्यक्रम मे माई पहुना के रूप मे बेमेतरा विधायक सिरी आशीष छाबड़ा जी उपस्थित रहिसे ओह ह अपन गोठ बात म कहिसे के हमर बेमेतरा ह साहित्य औ कला के नगर ये छत्तीसगढ़ी भाखा के उत्थापन अउ ओखर सम्मान करना हमर सब झन के जवाब दारी ये जेखर खातिर ये समिति के गठन होईसे तौन ह हमर लिए गरब के बात ये मोर जरूरत ये समिति ल जब भी पड़ही तुरंत खड़े रईहूं माता भद्रकाली महोत्सव जौन बेमेतरा मे बहुत जल्दी होवईया हे तौन म ईहां के कवि अउ कलाकार मन ल अपन प्रतिभा दिखाये के खातिर स्थानीय मन ल ज्यादा से ज्यादा अवसर मिलही ऐसे प्रयास करे जाही। ओखर संग मे पार्षद मनोज शर्मा, जोगेन्द्र छाबड़ा, प्रशांत शर्मा आये रहीन हे।
ये कार्यक्रम म पगरैत के रूप म बेमेतरा जिला के मयारू हास्य व्यंग्य कवि अउ छत्तीसगढ़ी साहित्य समिति के प्रदेश सचिव रामानन्द त्रिपाठी हर जम्मो पदाधिकारि अउ कार्यकारिणी मन ल सपथ देवावत कहिसे के छत्तीसगढ़ राज्य बने के बाद छत्तीसगढ़ी भाखा ह हमर बोल चाल म ज्यादा से ज्यादा प्रभाव पड़ीसे अब छत्तीसगढ़ी मे बात करना अपन आपमे गरब महसूस होवथे सरकारी विभाग म काम काज म घलोक ऐखर जादा से जादा उपयोग करे के जरूरत हे तभे छत्तीसगढ़ी भाखा के मान ह बढ़ही।
समिति के संरक्षक हमर बड़का कवि डा.राजेन्द्र पाटकर अउ मोहित राम वर्मा,प्रदेश कार्यकारिणी सदस्य ईश्वर साहु आरूग अउ मोहन वैष्णव घलोक एक साथ मिलके अपन अपन विचार म कहिस के छत्तीसगढ़ी भाखा के प्रचार प्रसार तभे संभव हो पाही जब हमन अपन अपन घर म लईका मन ल संस्कार देबो अउ लेखनी म गद्य और पद्य दोनो लिखबो।
कार्यक्रम के खास सगा के रूप मे समाज सेवी ताराचंद माहेश्वरी औ किसान नेता अजय शर्मा ह खास कर पहुंचे रहिसे उहु मन समिति के पदाधिकारी मन ल बधाई देवत कहिसे के ये समिति जौन मकसद से गठन होये हे ओखर मकसद जरूर पूरा होवय यही भगवान से हमन प्रर्थना करथन।
अवईया जम्मो कवि मन बारी बारी करके अपन छत्तीसगढ़ी भाखा म कविता पाठ करिन हे कभू कविता म हंसवाईन तो कभू गीत अउ गजल त कभू श्रृंगार रस मे डूबकी लगवईन तो कभू भारत माता के जयकारा लगवाईन।
